ପିଲାଙ୍କ ଢଗଢମାଳି - ୪

ସଙ୍କଳନ ଓ ସମ୍ପାଦନା - ଗୋବିନ୍ଦ ଚନ୍ଦ୍ର ଚାନ୍ଦ

ଅତିଥିମାନଙ୍କ ସହ ଯୋଗୀ (୧୭୮୦ ମସିହାରେ କାଗଜରେ ଅଙ୍କା ଜଳଛବି)
ହନଲୁଲୁ ମ୍ୟୁଜିଅମ୍ ଅଫ୍ ଆର୍ଟ୍‌ରେ ସ୍ଥାନିତ (ଫଟୋ କ୍ରେଡିଟ୍ -  ୱିକିମିଡିଆ କମନ୍ସ୍)

୧୬

ଅକାଳ ନନ୍ଦ, ବାଳ ଗୋବିନ୍ଦ ।

ବାଳ କେରି କେରି ପକାଏ ଛନ୍ଦ ।

ଅର୍ଥ - ଆଶା କରାଯାଉ ନ ଥିବା, ଏପରିକି ଅକାଳରେ ମିଳୁଥିବା, ଜିନିଷକୁ ଅଧିକ ଗୁରୁତ୍ୱ ଦିଆଯାଏ ।

୧୭

ଅକାଳ ପାଉଁଶ ସକାଳେ ପୂଜା ।

ଅର୍ଥ - ଆଜି ଯେଉଁ ପଦାର୍ଥ ଅଦରକାରୀ ଓ ଅଯୋଗ୍ୟ ସେ ଆଗାମୀ ଦିନରେ ଭଲ କାମରେ ଲାଗି ପାରେ ।

୧୮

ଅକାଳ ଯୋଗୀ ସକାଳେ ବା ଅକାଳ ବାବାଜୀ ସକାଳେ ଦେଖା ।

ଅର୍ଥ - ଯେଉଁ ବ୍ୟକ୍ତି ପହଞ୍ଚିବା ଆଶା କରାଯାଇ ନ ଥାଏ, ସେ ବ୍ୟକ୍ତି ହଠାତ୍ ଅସମୟରେ ଆସି ପହଞ୍ଚିବା ।

୧୯

ଅକାଳେ ଗଲି ଘଷି ସାଉଁଟି ।

ଘରେ ଥିଲେ ସୁଖ ପାଉ ଥାଆନ୍ତି ।

ଅର୍ଥ - ଠିକ୍ ସମୟରେ ଠିକ୍ କାମ ନ କରି ଦୁଃଖ ପାଇବା ।

୨୦

ଅକାଳେ ସକାଳେ କଲି ବେଉସା

ମୁଣ୍ଡରେ ବାଜିଲା କୁରାଢ଼ି ପଶା ।

ଅର୍ଥ - କୌଣସି କାମରେ ଅନଭ୍ୟସ୍ତ ବ୍ୟକ୍ତି ସେହି ନୂଆ କାର୍ଯ୍ୟଟି କରି ହଟହଟା ହେବା । 

ବି.ଦ୍ର. - ଏହି ଢଗଢମାଳିଗୁଡ଼ିକ ଗୋବିନ୍ଦ ଚନ୍ଦ୍ର ଚାନ୍ଦଙ୍କର ସଙ୍କଳନ ଓ ସମ୍ପାଦନାରେ ପ୍ରକାଶିତ 'ଓଡ଼ିଆ ଶିଶୁ-କିଶୋର ଢଗଢମାଳି'ରୁ ଆନୀତ । ବହିଟି ନୂଆଦିଲ୍ଲୀସ୍ଥ କେନ୍ଦ୍ର ସାହିତ୍ୟ ଅକାଦେମୀ ୨୦୧୭ ମସିହାରେ ପ୍ରଥମେ ଛାପିଥିଲେ ।