କୁଶାଣ ବଂଶ ଓ କନିଷ୍କ
କେଦାରନାଥ ମହାପାତ୍ର
କନିଷ୍କଙ୍କର କବନ୍ଧ ପ୍ରତିମୂର୍ତ୍ତି ଫଟୋ କ୍ରେଡ଼ିଟ୍ - ୱିକିମିଡିଆ କମନ୍ସ୍ |
କୁଶାଣବଂଶ
ଶକମାନଙ୍କ
ପରି କୁଶାଣମାନେ ମଧ୍ୟ ଏସିଆରୁ
ଉତ୍ତରପଶ୍ଚିମ ଗିରିସଙ୍କଟ ବାଟରେ
ଭାରତକୁ ଆସିଥିଲେ । କୁଶାଣ ବଂଶର
ରାଜା ପ୍ରଥମ କଡଫସ ବା କାଡଫିସେସ
ଗାନ୍ଧାର ରାଜ୍ୟ ଜୟ କରି ସିନ୍ଧୁ ନଦୀ
ପର୍ଯ୍ୟନ୍ତ ରାଜ୍ୟ ବିସ୍ତାର
କରିଥିଲେ । ତାଙ୍କ ପରେ ତାଙ୍କର
ପୁତ୍ର ଭୀମ କଡଫସ୍ ବା ଦ୍ୱିତୀୟ
କଡଫସ୍ ପ୍ରାୟ ବାରାଣସୀ ପର୍ଯ୍ୟନ୍ତ
ଜୟ କରିଥିଲେ । ତାଙ୍କ ପରେ ଏହି
ବଂଶର ଶ୍ରେଷ୍ଠ ରାଜା କନିଷ୍କ
ରାଜତ୍ୱ କରିଥିଲେ ।
କନିଷ୍କ
ସେ
୭୮ ଖ୍ରୀଷ୍ଟାଦ୍ଦରେ ସିଂହାସନ ଆରୋହଣ କରି ଥିବାର କେତେକ ପଣ୍ଡିତ ସ୍ଥିର
କରିଛନ୍ତି [ଏବେ ପଣ୍ଡିତମାନେ ଏହା ୧୨୭ ଖ୍ରୀଷ୍ଟାବ୍ଦ ବୋଲି ହିସାବ କରୁଛନ୍ତି] । ସେ ଚୀନ ସମ୍ରାଟଙ୍କୁ
ଓ ପାଟଳୀପୁତ୍ରର ରାଜାଙ୍କ ପରାସ୍ତ
କରିଥିଲେ । ସମଗ୍ର ଉତ୍ତର ଭାରତ
ତାଙ୍କ ସାମ୍ରାଜ୍ୟର ଅନ୍ତର୍ଭୂକ୍ତ
ଥିଲା । ମଲା ବେଳକୁ ତାଙ୍କର
ସାମ୍ରାଜ୍ୟ ଚୀନ ଦେଶର ସୀମାନ୍ତରୁ
ନର୍ମଦା ନଦୀ ଓ ପୂର୍ବରେ ବଙ୍ଗ ଦେଶ
ପର୍ଯ୍ୟନ୍ତ ବିସ୍ତୃତ ଥିଲା ।
ପୁରୁଷପୁର ବା [ପାକିସ୍ତାନରେ ସ୍ଥିତ] ଆଧୁନିକ ପେଶାବାର
ତାଙ୍କର ରାଜଧାନୀ ଥିଲା ।
ସେ
ପ୍ରଥମେ ଶୈବ ଥିଲେ କିନ୍ତୁ ପରେ
ବୌଦ୍ଧ ଧର୍ମ ଗ୍ରହଣ କରିଥିଲେ ଓ
ଅଶୋକଙ୍କ ପରି ବୌଦ୍ଧ ଧର୍ମର ଉନ୍ନତି
ପାଇଁ ମନପ୍ରାଣ ଢାଳି ଦେଇଥିଲେ
। ପୁରୁଷପୁରରେ ଅପୂର୍ବ
କାରୁକାର୍ଯ୍ୟଶୋଭିତ ଗୋଟିଏ
ବିଶାଳ ଚୈତ୍ୟ ନିର୍ମାଣ କରିଥିଲେ
ଓ ଗୋଟିଏ ବୌଦ୍ଧ ସଭା ବସାଇଲେ ।
ତାଙ୍କ ସମୟରେ ବୌଦ୍ଧମାନେ ହୀନଯାନ
ଓ ମହାଯାନ ଦୁଇ ସମ୍ପ୍ରଦାୟରେ
ବିଭକ୍ତ ହୋଇଥିଲେ । ତାଙ୍କର
ଧର୍ମଗୁରୁ ନାଗାର୍ଜୁନ, ମହାଯାନ
ପନ୍ଥାର ପ୍ରବର୍ତ୍ତକ ଥିଲେ ।
କନିଷ୍କଙ୍କ ପୂର୍ବରୁ ଥିବା
ବୌଦ୍ଧମାନେ ହୀନଯାନ ପନ୍ଥା ଅନୁସରଣ
କରୁଥିଲେ । ହୀନଯାନୀମାନେ ବୁଦ୍ଧଙ୍କ
ମୂର୍ତ୍ତି ପୂଜା କରୁ ନ ଥିଲେ ।
କେବଳ ଚକ୍ର,
ବୋଧିଦ୍ରୁମ
ଇତ୍ୟାଦି ପୂଜା କରୁଥିଲେ ।
ମହାଯାନୀମାନେ ବୁଦ୍ଧଙ୍କ ମୂର୍ତ୍ତି
ପୂଜା ଚଳାଇଲେ । କନିଷ୍କଙ୍କ
ସାହାଯ୍ୟରେ ମହାଯାନ ବୌଦ୍ଧଧର୍ମ
କାଶ୍ମୀର,
ମଧ୍ୟ-ଏସିଆ,
ଚୀନ,
ତିବ୍ଦତ
ପ୍ରଭୃତିରେ ବ୍ୟାପି ଯାଇଥିଲା
। ବୌଦ୍ଧଧର୍ମର ପ୍ରସାର ପାଇଁ ସେ
ଅନେକ ସ୍ତୂପ,
ମଠ
ଓ ଚୈତ୍ୟ ନିର୍ମାଣ କରିଥିଲେ ।
ସେ ବିଦ୍ୟାର ଆଦର କରୁଥିଲେ ।
ନାଗାର୍ଜୁନ,
ପ୍ରସିଦ୍ଧ
କବିରାଜ ଚରକ,
କବିବର
ଅଶ୍ୱଘୋଷ ଓ ପଣ୍ଡିତ ବସୁମିତ୍ର
ତାଙ୍କ ସଭାରେ ଥିଲେ । ଚରକଙ୍କ
ଦ୍ୱାରା ରଚିତ ‘ଚରକ ସଂହିତା’
ଗୋଟିଏ ଉତ୍କୃଷ୍ଟ ଆୟୁର୍ବେଦ
ଗ୍ରନ୍ଥ । କନିଷ୍କ ମୃତ୍ୟୁ ପରେ
ହବିଷ୍କ ଓ ବାସୁଦେବ ନାମକ ଏହି
ବଂଶର ଦୁଇ ଜଣ ରାଜା ରାଜତ୍ୱ କରିଥିଲେ
।
ବି.ଦ୍ର. - ଏହି ଲେଖାଟି 'ଅଭିନବ ଭାରତ ଇତିହାସ' ବହିରୁ ନିଆଯାଇଛି । ପୁସ୍ତକଟି କେଦାରନାଥ ମହାପାତ୍ରଙ୍କ ଦ୍ୱାରା ୬ଷ୍ଠ ଓ ୭ମ ଶ୍ରେଣୀ ନିମନ୍ତେ ପାଠ୍ୟପୁସ୍ତକ ଭାବରେ ଲିଖିତ ଓ ଷ୍ଟ୍ୟୁଡ଼େଣ୍ଟ୍ସ୍ ଷ୍ଟୋର୍ଙ୍କ ଦ୍ୱାରା ୧୯୩୮ ମସିହାରେ ପ୍ରକାଶିତ । ସୃଜନିକ ସଂସ୍ଥାଙ୍କ ସୂତ୍ରରୁ ବହିଟି ମିଳିଥିବାରୁ ଆମେ ତାଙ୍କ ପାଖରେ କୃତଜ୍ଞ ।
No comments:
Post a Comment