ପିଲାଙ୍କ ପାଇଁ କବିତା - 'ଲେଖାପଢ଼ା'

କବି - ଜଗନ୍ନାଥ ପ୍ରସାଦ ଦାସ

ସଙ୍ଗ୍‌ସ୍ ଅଫ ଇନୋସେନ୍ସ୍ ଆଣ୍ଡ ଏକ୍ସପେରିଏନ୍ସ୍‌ର
୧୮୨୬ ମସିହାର ସଂସ୍କରଣରୁ ଫର୍ଦ୍ଦେ
କବି - ୱିଲିଅମ୍ ବ୍ଲେକ୍
ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍ 

ଜାଣେନା କବିତାମାନେ କେଉଁଠାରେ ଥାଇ
କିପରି ଆସନ୍ତି ମୋର ସ୍ୱପ୍ନକୁ ଓହ୍ଲାଇ ।
ପାଖରେ ମୁଁ ରଖିଥାଏ କଲମ କାଗଜ
କବିତା ଲେଖିବା ତେଣୁ ମୋ ପାଇଁ ସହଜ ।

ଏଇପରି ଥିଲି ଦିନେ ନିଶାରେ ଅତଳ
ବହିଗଲା ମୋ ଛାତିରେ କବିତାର ଝର ।
ଭାଙ୍ଗିଦେଲା ନିଦ ମୋର ପରଲୋକବାସୀ
ଉଠି ପଡ଼ି କବିତାକୁ ଲେଖିନେଲି ବସି ।

ସନ୍ତୋଷରେ ଶୋଇଗଲି ଉଠିଲି ସକାଳେ
ଦେଖିଲି ସୁନ୍ଦର ଭାବେ କାଗଜ ଉପରେ
ନିଟୋଳ ଅକ୍ଷର ନେଇ ରହିଛି ସଜାଡ଼ି
ଦୀର୍ଘ ଏକ କବିତାର ଚଉବନ ଧାଡ଼ି ।

ଶତ ଚେଷ୍ଟା କରି କିନ୍ତୁ ହେଲି ଅସଫଳ
ପଢ଼ିବାକୁ, ହାୟ, ମୋର ନିଜ ହସ୍ତାକ୍ଷର ।

ବି.ଦ୍ର. - ଏହି କବିତାଟି ଜଗନ୍ନାଥ ପ୍ରସାଦ ଦାସ ଲିଖିତ ବହି 'ଆନମାନ'ରୁ ନିଆଯାଇଅଛି । ବହିଟି ଭୁବନେଶ୍ୱରସ୍ଥ ପ୍ରକାଶନ ସଂସ୍ଥା ଟାଇମପାସ ୨୦୧୬ ମସିହାର ମାର୍ଚ୍ଚ ମାସରେ ଛପାଇଥିଲେ ।