ସୌରମଣ୍ଡଳ ବିଷୟରେ କିଛି ରୋଚକ ତଥ୍ୟ 

ଅନୁବାଦ - ବିଶ୍ୱଜିତ ଆପଟ

କୃତ୍ରିମ ଉପଗ୍ରହ ଇନ୍‌ସାଟ୍ '୧ଖ'ର ଚିତ୍ର

୧

ବୃହସ୍ପତି, ଶନି ଓ ୟୁରାନସ୍ ଆଦି ଗ୍ରହଗୁଡିକ ଚାରିପାଖରେ ବଳୟ ରହିଛି । ବଳୟ ହେଉଛି ଗ୍ରହ ଅବଶେଷଗୁଡିକର ଏକ ରକମର ପଟିଟିଏ । ଶକ୍ତିଶାଳୀ ଦୂରବୀକ୍ଷଣ ଯନ୍ତ୍ର ସହାୟତାରେ ଆମେ ଏହି ବଳୟଗୁଡିକୁ ଦେଖିପାରିବା ।

୨

କୌଣସି ଭାଷାରେ ବ୍ୟବହୃତ ହେଉଥିବା ଅନେକ ଶବ୍ଦ ଅନ୍ୟ କେଉଁ ଭାଷାରୁ ମଧ୍ୟ ଆସିଥାଇ ପାରେ । ଜୋଗ୍ରାଫି ଏକ ଇଂରାଜୀ ଶବ୍ଦ । ଏହାର ଉତ୍ପତ୍ତି ରହିଛି ଗ୍ରୀକ୍ ଭାଷାରେ । ଗ୍ରୀକ୍ ଶବ୍ଦ “ଜିଓ” ଅର୍ଥାତ ପୃଥିବୀ ଓ “ଗ୍ରାଫିଆ” ଯାହା ଲେଖିବାକୁ ବୁଝାଏ – ଏ ଦୁଇଟି ଶବ୍ଦକୁ ନେଇ Geography ଶବ୍ଦଟିର ଗଠନ ହୋଇଛି । ପୃଥିବୀ ବିଷୟରେ ଅଧିକ ତଥ୍ୟ ତୁମେ ନିଜେ ଅନୁସନ୍ଧାନ କର ।

୩

ମନୁଷ୍ୟମାନେ ବହୁ କାଳରୁ ରାତିର ଆକାଶକୁ ଦେଖି ଚକିତ ହୋଇ ଆସିଛନ୍ତି । ଯେଉଁମାନେ ମହାଜାଗତିକ ପିଣ୍ଡ ଓ ସେଗୁଡିକର ଗତିବିଧି ଅଧ୍ୟୟନ କରନ୍ତି ସେମାନଙ୍କୁ ମହାକାଶ ବିଜ୍ଞାନୀ କୁହାଯାଏ । ଆର୍ଯ୍ୟଭଟ୍ଟ ପ୍ରାଚୀନ ଭାରତର ଜଣେ ପ୍ରସିଦ୍ଧ ମହାକାଶ ବିଜ୍ଞାନୀ । ବର୍ତ୍ତମାନ ପୃଥିବୀର କୋଣେ କୋଣେ ମହାକାଶ ବିଜ୍ଞାନୀମାନେ ବିଶ୍ୱବ୍ରହ୍ନାଣ୍ଡର ଅନ୍ୱେଷଣରେ ଲାଗିଛନ୍ତି ।

୪

ଆଲୋକ ପ୍ରତି ସେକେଣ୍ଡରେ ପ୍ରାୟ ୩ ଲକ୍ଷ କିଲୋମିଟର ବେଗରେ ଗତି କରେ । ଏତେ ବେଗଶାଳୀ ହୋଇ ସୁଦ୍ଧା ସୂର୍ଯ୍ୟ ଠାରୁ ଆଲୋକ ପୃଥିବୀରେ ପହଞ୍ଚିବା ପାଇଁ ପ୍ରାୟ ୮ ମିନିଟ୍ ସମୟ ଲାଗିଯାଏ ।

୫

 ନୀଲ୍ ଆର୍ମଷ୍ଟ୍ରଙ୍ଗ୍ ଚନ୍ଦ୍ରପୃଷ୍ଠରେ ପାଦ ରେଇଥିବା ପ୍ରଥମ ବ୍ୟକ୍ତି ଅଟନ୍ତି । ୧୯୬୯ ମସିହା ଜୁଲାଇ ୨୧ ତାରିଖରେ ସେ ଚନ୍ଦ୍ରପୃଷ୍ଠରେ ଅବତରଣ କରିଥିଲେ । କୌଣସି ଭାରତୀୟ ବ୍ୟକ୍ତି କେବେ ଚନ୍ଦ୍ରପୃଷ୍ଠକୁ ଯାଇଛନ୍ତି କି ନାହିଁ ତୁମେ ଖୋଜି ବାହାର କର ।

୬

ଉପଗ୍ରହ ହେଉଛି ଏକ ମହାଜାଗତିକ ପିଣ୍ଡ ଯାହା ଗ୍ରହ ଚାରିପଟେ ବୁଲିଥାଏ, ଠିକ ଯେମିତି ଗ୍ରହମାନେ ସୂର୍ଯ୍ୟ ଚାରିପଟେ ବୁଲିଥାଆନ୍ତି ।ମନୁଷ୍ୟ-କୃତ ଉପଗ୍ରହଗୁଡିକ କୃତ୍ରିମ ବସ୍ତୁ ଅଟନ୍ତି । ବିଶ୍ୱବ୍ରହ୍ମାଣ୍ଡ ସମ୍ବନ୍ଧରେ ଅଧିକ ତଥ୍ୟ ସଂଗ୍ରହ କରିବା ପାଇଁ ବା ଦୂର ସଞ୍ଚାର ପାଇଁ ବୈଜ୍ଞାନିକମାନେ ସେଗୁଡିକୁ ପ୍ରସ୍ତୁତ କରିଥାଆନ୍ତି । କୃତ୍ରିମ ଉପଗ୍ରହକୁ ରକେଟ୍ ବୋହିନିଏ ଓ ପୃଥିବୀର ଚାରିପଟେ ବୁଲିବା ପାଇଁ ଏକ କକ୍ଷରେ ଏହାକୁ ସ୍ଥାନିତ କରାଯାଏ । ଇନ୍‌ସାଟ୍, ଆଇ.ଆର୍.ଏସ୍. ଏଡୁସାଟ୍ ଇତ୍ୟାଦି ମହାକାଶରେ ଥିବା ଭାରତୀୟ ଉପଗ୍ରହ ଅଟନ୍ତି ।

ବି.ଦ୍ର. - ଏହି ଲେଖାଟି ଏନ.ସି.ଇ.ଆର୍.ଟି. ଛାପିଥିବା ଷଷ୍ଠ ଶ୍ରେଣୀ ପାଇଁ ଉଦ୍ଦିଷ୍ଟ ଭୂଗୋଳ ପାଠ୍ୟପୁସ୍ତକର ପ୍ରଥମ ଅଧ୍ୟାୟର ସମ୍ପାଦିତ ଓ ଅନୁଦିତ ଅଂଶ ।