ଶ୍ରମ ଓ ଶିକ୍ଷା - ୧
ଗୋପବନ୍ଧୁ ଦାସ
୧୯୩୭ ମସିହାର ଆମେରିକାରେ ଟାଇପିଙ୍ଗ କ୍ଲାସ (ୱିକିମିଡିଆ କମନ୍ସ୍) |
ଏଥର
ଉତ୍କଳ ଛାତ୍ର ସମ୍ମିଳନୀର ସଭାପତି
ରୂପେ କାପ୍ଟେନ୍ ପଟାଭେଲ ସାହେବଙ୍କୁ
ପାଇଥିବା ଓଡ଼ିଶା ଛାତ୍ରମାନଙ୍କ
ପକ୍ଷେ ବଡ଼ ଭାଗ୍ୟ ଓ ପ୍ରଶଂସାର
କଥା । ଶିକ୍ଷା ଜଗତରେ ପଟାଭେଲ
ଜଣେ ସୁପରିଚିତ ବ୍ୟକ୍ତି । କବି
ରବିନ୍ଦ୍ରନାଥଙ୍କ ଆମନ୍ତ୍ରଣରେ
ସେ ଏ ଦେଶକୁ ଆସିଛନ୍ତି । କଲିକତା
ବିଶ୍ୱବିଦ୍ୟାଳୟର ଗୁଣଗ୍ରାହୀ
ଭୂତପୂର୍ବ ଭାଇସ୍ଚାନ୍ସେଲର
ସାର ଆଶୁତୋଷ, ପଟାଭେଲଙ୍କ କଳ୍ପନା
ଓ ପ୍ରସ୍ତାବ ପ୍ରତି ବହୁ ଆସ୍ଥା
ଦେଖାଉଥିଲେ । ପଟାଭେଲଙ୍କ ଶିକ୍ଷା
ବିଷୟକ ଭାବଗୁଡ଼ିକ ବର୍ତ୍ତମାନ
ଆଉ କଳ୍ପନାରେ ନାହିଁ,
ରାଜା
ମଣିନ୍ଦ୍ରଚନ୍ଦ୍ର ନନ୍ଦୀଙ୍କ
ଆନୁକୂଲ୍ୟରେ କଲିକତାର ବିବିଧ
ବ୍ୟାବସାୟିକ ବିଦ୍ୟାଳୟରେ ଆପଣାର
କଳ୍ପନାକୁ କାର୍ଯ୍ୟରେ ପରୀକ୍ଷା
କରିବାର ସୁଯୋଗ ପଟାଭେଲଙ୍କୁ
ମିଳି ଅଛି । ତାଙ୍କ ମତ ଯେ କେବଳ
ପୁସ୍ତକଗତ ଶିକ୍ଷା, ଶିକ୍ଷା ନୁହେଁ ।
ଶିକ୍ଷା କେବଳ ପୁସ୍ତକରେ ସୀମାବଦ୍ଧ
ହୋଇ ରହିବା ଯୋଗୁଁ ଶିକ୍ଷିତ
ଲୋକେ ସାଂସାରିକ କାର୍ଯ୍ୟରେ
ଅଧିକାଂଶ ଅକର୍ମଣ୍ୟ ହେଉଛନ୍ତି
ଏବଂ ସବୁ ଅବସ୍ଥା ଓ ସବୁ ଶ୍ରେଣୀର
ଲୋକେ ଶିକ୍ଷା ପାଇ ପାରୁ ନାହାନ୍ତି ।
ଶ୍ରମ ଓ ଶିକ୍ଷା ଏକ ସଙ୍ଗେ ଚାଲିବା
ଆବଶ୍ୟକ । ପାଠ ପଢ଼ିବା ସଙ୍ଗେ
ସଙ୍ଗେ ଛାତ୍ରମାନଙ୍କୁ କାମ
କରିବାକୁ ହେବ ।
ଏ
କଳ୍ପନା ନୂଆ ନୁହେଁ । ଗ୍ରୀସ ଦେଶର
ଦାର୍ଶନିକ ପ୍ଲେଟୋ ପ୍ରାଚୀନ
ଜଗତର ଜଣେ ସୁପ୍ରସିଦ୍ଧ ଶିକ୍ଷା ବିଶାରଦ
ଥିଲେ । ବାଳକମାନେ ପଢ଼ିବା ଅବସ୍ଥାରେ
ବୟସ୍କ ବ୍ୟକ୍ତିଙ୍କ ସଙ୍ଗେ
କାର୍ଯ୍ୟରେ ସହଯୋଗିତା କରିବା
ବ୍ୟବସ୍ଥା, ପ୍ଲେଟୋ ଶିକ୍ଷା
ବିଧାନରେ ନିର୍ଦ୍ଦେଶ କରିଛନ୍ତି ।
ଭାରତର ପ୍ରାଚୀନ ଶିକ୍ଷା ବିଧାନରେ
ଶିକ୍ଷା ସଙ୍ଗେ ଶ୍ରମର ସଂଯୋଗ
ସାଧାରଣ ରୀତି ଥିଲା । ଗୁରୁ ଘରେ
ବା କୁଳଗୃହରେ ଛାତ୍ରମାନେ ରହି
ପାଠ ପଢ଼ୁ ଥିଲେ । ମାସକୁ ମାସ ସ୍କୁଲ
କଲେଜ ଦରମା ଦେବା ଢଙ୍ଗ ନ ଥିଲା ।
ଛାତ୍ରମାନେ ଗାଈ ଚରାଇବା, ବନ୍ଧ
ପକାଇବା, ବିଲ ବାଛିବା, ଜାଳ ଭାଙ୍ଗିବା, ଆଦି ଯାବତୀୟ କାର୍ଯ୍ୟ କରୁଥିଲେ; ଗୁରୁ ଗୃହକୁ ସେମାନେ ଆପାଣର ଘର
ବୋଲି ମଣୁ ଥିଲେ । ନିଜ ଘର ଲାଗି
ସେମାନେ ତିଳେ କୁଣ୍ଠିତ ହେଉ
ନ ଥିଲେ।
ଏପରି
କାର୍ଯ୍ୟ କରିବା ଦ୍ୱାରା କୁଳ
ଗୃହର ଯେ କେବଳ ଆର୍ଥକ ଲାଭ ହେଉ ଥିଲା
ତାହା ନୁହେଁ, ଛାତ୍ରମାନଙ୍କର
ସାଂସାରିକ ବିଷୟରେ ବାଲ୍ୟାକାଳରୁ
ନାନା ଅଭିଜ୍ଞତା ଜନ୍ମ ଥିଲା । ପାଞ୍ଚ ଜଣ
ମିଶି ଭ୍ରାତୃଭାବରେ ଏକତ୍ରେ
କାର୍ଯ୍ୟ କରିବାର ସେମାନେ ଶିଖୁ ଥିଲେ ।
ପାଠପଢ଼ୁଆ ଲୋକଙ୍କ ପକ୍ଷେ
ବିଲ ବାଛିବା, କୋଡ଼ି ହାଣିବା, ଆଦି
ନିନ୍ଦାର କାର୍ଯ୍ୟ ବୋଲି ଆଜିକାଲି
ଶିକ୍ଷିତ ଲୋକଙ୍କର ଯେ ଧାରଣା
ହୋଇଛି, ସେଭଳି ଧାରଣା ପୂର୍ବର
କୁଳଗୃହବାସୀ ଛାତ୍ରଙ୍କ ହୃଦୟରେ
ସ୍ଥାନ ପାଉ ନ ଥିଲା । ଏଭଳି କାର୍ଯ୍ୟ
କରିବା ଯୋଗୁଁ, ସେ କାଳର ଛାତ୍ରମାନଙ୍କର
ପଢ଼ବା ଲାଗି ଅର୍ଥଚିନ୍ତା ନଥିଲା।
ବ୍ରହ୍ମଚର୍ଯ୍ୟ ବା ଛାତ୍ର ଜୀବନ
ଶେଷରେ ଗୃହସ୍ଥାଶ୍ରମରେ ପ୍ରବେଶ
କରି ସେମାନେ ଜୀବିକା ନିର୍ବାହ
ଲାଗି ଯେ କୌଣସି କାର୍ଯ୍ୟ କରିବାକୁ
ପ୍ରସ୍ତୁତ ହେଉଥିଲେ ।
ସେମାନଙ୍କ
ସଙ୍ଗେ ତୁଳନା କଲେ, ଆଜିକାଲିର
ଶିକ୍ଷିତ ଯୁବକ ଏକ ଶୋଚନୀୟ
ପ୍ରାଣୀ । ଚାକିରୀ ଛଡ଼ା ତାଙ୍କୁ
ଆଉ କିଛି ଦିଶୁ ନାହିଁ । ଶ୍ରମର ଗୌରବ
ବିଷୟରେ ଯେତେ ବକ୍ତୃତା କରନ୍ତୁ
ପଛକେ, କୌଣସି ପ୍ରକାର କାୟିକ ଶ୍ରମ
କରିବାକୁ ସେ ପ୍ରସ୍ତୁତ ନୁହନ୍ତି ।
ତାଙ୍କ ଦେହରେ ବଳ ନାହିଁ କି ମନରେ
ବଳ ନାହିଁ । ବାଟ ଦି କୋଶ ଚାଲିବା
ତାଙ୍କ ପକ୍ଷେ କଷ୍ଟସାଧ୍ୟ । ଚାକିରୀ
ଛଡ଼ା ଅନ୍ୟ କୌଣସି କ୍ଷେତ୍ରରେ
ପ୍ରବେଶ କରିବାକୁ ସାହସର ଅଭାବ ।
ସେ ଯାହା ହେଉ, ଶିକ୍ଷା ସଙ୍ଗେ
ଶ୍ରମର ସଂଯୋଗ ହେଲେ, ଛାତ୍ରଜୀବନରେ
ନିଶ୍ଚୟ ପରିବର୍ତ୍ତନ ଆସିବ,
ଛାତ୍ର
ଆତ୍ମନିର୍ଭରଶୀଳ ହେବ । ଆଜି ଅନେକ
ଗରିବ ଛାତ୍ରଙ୍କୁ ସାହାଯ୍ୟ ଲାଗି
ଅନେକଙ୍କ ନିକଟରେ ଯେପରି ଗୋଡ଼ ଭାଙ୍ଗି
ଛିଡ଼ା ହେବାକୁ ହେଉଛି, ସେ ଅବସ୍ଥା
ଅନେକ ପରିମାଣରେ ବଦଳି ଯାଇ ପାରେ ।
(ସମାଜ,
ତା
୨୯-୧-୧୯୨୭)
No comments:
Post a Comment