ଶ୍ରମ ଓ ଶିକ୍ଷା - ୩
ଗୋପବନ୍ଧୁ ଦାସ
ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍ |
ବର୍ତ୍ତମାନ
ସମୟର ଶିକ୍ଷା ବିଧାନରେ ଶ୍ରମ ଓ
ଶିକ୍ଷାର ସଂଯୋଗ ଲାଗି ତେତେ
ସୁବିଧା ନାହିଁ । ବିଶ୍ୱବିଦ୍ୟାଳୟ
ପରୀକ୍ଷାରେ ପାସ ହେଲା ମୁଖ୍ୟ
ଲକ୍ଷ୍ୟ । ବିଶ୍ୱବିଦ୍ୟାଳୟ ପୁଣି
ଏତେ ବିଷୟରେ ପାଠ୍ୟ ପୁସ୍ତକ
ନିରୂପଣ କରିଛନ୍ତି, ବିଶେଷ ଭାଗ
ଶିକ୍ଷା ଦିଆ ଯାଇଛି ବିଦେଶୀ ଭାଷାରେ । ତେଣୁ, ପାଠକୁ ଆୟତ୍ତ କରିବାରେ
ଛାତ୍ରର ଅଧିକାଂଶ ସମୟ ଯାଉଛି ।
ଛାତ୍ରର ମତିଗତି ବୁଝି ପାଠ ନିରୂପଣ
କରିବା ଶିକ୍ଷକଙ୍କ କ୍ଷମତାରେ
ନାହିଁ । ନିରୂପିତ ପାଠକୁ ପ୍ରତ୍ୟେକ
ଛାତ୍ରଙ୍କୁ ପଢ଼ିବାକୁ ହେବ ।
ଏହି
ସବୁ କାରଣରୁ ବର୍ତ୍ତମାନ ସମୟରେ
ଆମ ଦେଶ ଛାତ୍ରଙ୍କର ବହୁ ସମୟ
ଯାଉଛି ଏବଂ ଶକ୍ତିକ୍ଷୟ ହେଉଛି ।
ଶ୍ରମ କରିବାକୁ ସେମାନଙ୍କର ବେଳ
ନାହିଁ କି ମନ ବଳୁ ନାହିଁ । ସର୍ବାପେକ୍ଷା
ଅଧିକ ଅନ୍ତରାୟ ଯେ ଏବେ ଛାତ୍ର
ଜୀବନରେ ପୂର୍ବ ବ୍ରହ୍ମଚାର୍ଯ୍ୟର
ତେଜସ୍ୱିତା ନାହିଁ । ସେ ଧୈର୍ଯ୍ୟ, ସହିଷ୍ଣୁତା, ନିରଭିମାନ, ସେବା, ବିନୟ ଓ ଆଜ୍ଞାନୁବର୍ତ୍ତିତା
ନାହିଁ । ସ୍କୁଲ କଲେଜର ଅଧିକାଂଶ
ଯୁବକଙ୍କୁ ବିଳାସିତା, ଶୈଥିଲ୍ୟ, ଆଳସ୍ୟ ଓ ଅହଙ୍କାର ଗ୍ରାସ କରିଛି
।
ଶିକ୍ଷା
ଓ ଶ୍ରମର ସଂଯୋଗ ଉଦ୍ୟମକୁ
କୃତକାର୍ଯ୍ୟ କରିବାକୁ ହେଲେ, ବର୍ତ୍ତମାନ ପ୍ରଣାଳୀ ଓ ପଦ୍ଧତି
ବଦଳାଇବାକୁ ହେବ । ପରେ ବିଷୟ, ସମୟ, ସ୍ଥାନ ଓ ପରିସର ବଦଳାଇବାକୁ ହେବ
। ସେପରି ବିଶ୍ୱାସୀ ନିଷ୍ଠାପର
ଶିକ୍ଷିକ ମଧ୍ୟ ଲୋଡ଼ା, ଯାହାଙ୍କ
ପ୍ରଭାବରେ ସ୍କୁଲମାନ ପବିତ୍ର
ପ୍ରେମମୟ ଗୁରୁଗୃହରେ ପରିଣତ
ହେବ । ଏହା ହିଁ ଯଥାର୍ଥରେ ଆମ୍ଭମାନଙ୍କର
ଜାତୀୟ ବିଦ୍ୟାଳୟ । ଜାତୀୟ
ବିଦ୍ୟାଳୟରେ କେବଳ ବହି ପଢ଼ିବାକୁ
ହେବ ନାହିଁ । ତହିଁ ସଙ୍ଗେ ସଙ୍ଗେ
ହାତ, ଗୋଡ, ଆଖି, ନାକ, କାନ, ଆଦିର
ଚାଳନା କରିବାକୁ ହେବ । ମନୁଷ୍ୟ
କର୍ମେନ୍ଦ୍ରିୟ ଓ ଜ୍ଞାନେନ୍ଦ୍ରିୟର
ଶକ୍ତିକୁ କାର୍ଯ୍ୟରେ ଲଗାଇବା
ଲାଗି ପ୍ରସ୍ତୁତ ହେବ । ଏହା ହେଲେ ସେ ଅଭୁତ ସାଧନ
କରି ପାରେ ।
ଜୀବିକା ଲାଗି ମହାତ୍ମା ଗାନ୍ଧି ଏତେ ଜୋରରେ
କହୁଛନ୍ତି, ଏହା ହିଁ ତାହାର
ଉଦ୍ଦେଶ୍ୟ । ସୂତାକଟା ସଙ୍ଗେ
କପାଚାଷ, ଅରଟ ତିଆରି, ତୁଳାଭିଣା, ଲୁଗାବୁଣା, ରଙ୍ଗ ତିଆରି, ଆଦି ଚଷା, ବଢ଼େଇ, କମାର, ରଙ୍ଗଣୀ, ତନ୍ତି, ପ୍ରଭୃତି ଭିନ୍ନଭିନ୍ନ ଜାତିର
ବ୍ୟବସାୟର ସମ୍ପର୍କ ରହି ଅଛି ।
ତୁଳାଭିଣା, ସୂତାକଟା, ଏ ସବୁ କାର୍ଯ୍ୟର
ଉପଲକ୍ଷଣ ମାତ୍ର । ଫଳ କଥା, ପୁସ୍ତକଗତ
ଶିକ୍ଷା ସଙ୍ଗେ, କର୍ମଶିକ୍ଷାର
ଅର୍ଜନ ଜାତୀୟ ବିଦ୍ୟାଳୟର ପ୍ରଧାନ
ଉଦ୍ଦେଶ୍ୟ । ସତ୍ୟବାଦୀ ପୁଣି ଜାତୀୟ
ବିଦ୍ୟାଳୟ ଭାବେ ଆରମ୍ଭ ହୋଇ ଅଛି ।
ପୂର୍ବେ ଏ ବିଷୟରେ ସେଠାରେ ଯେ
ପରୀକ୍ଷା ହୋଇ ଥିଲା, ଆଜି ମଧ୍ୟ
ସେ ପରୀକ୍ଷା ଲାଗି ପୂର୍ବର ଯଥେଷ୍ଟ
ଉପାଦାନ ଥିବ । ପୂର୍ବର ସଂସ୍କାର
ଓ ସୁନାମ ମଧ୍ୟ ଅଛି ।
ତେଣୁ
ବୋଲିବା ବାହୁଲ୍ୟ, ଓଡିଶାରେ
ପଟାଭେଲଙ୍କ ପରୀକ୍ଷା ଲାଗି
ସତ୍ୟବାଦୀ ପ୍ରଶସ୍ତ କ୍ଷେତ୍ର ।
ଦେଶର ବର୍ତ୍ତମାନ ଅବସ୍ଥା ଦୃଷ୍ଟିରେ
ପଟାଭେଲଙ୍କ ପ୍ରସ୍ତାବ ଓ ପରାମର୍ଶମାନ
କାର୍ଯ୍ୟରେ ଲଗାଇବା କେତେ ଦୂର
ଆବଶ୍ୟକ, ଓଡିଶାର ଛାତ୍ରସମାଜ
ପକ୍ଷେ ଏହା ଗୁରୁତର ବିବେଚନାର
ବିଷୟ । ଅନ୍ତତଃ କେତେଜଣ ପ୍ରୟୋଜନୀୟ
ନିଷ୍ଠା ଓ ହୃଦୟର ବିଶ୍ୱାସ ଧରି
ଏ ପରୀକ୍ଷାରେ ପ୍ରବୃତ୍ତ ନ ହୋଇ
ପାରିଲେ, ସମ୍ମିଳନୀର ଉଦ୍ୟମ ବୃଥା, ପଟାଭେଲଙ୍କ ସଭାପତି ହେବା ଅକାରଣ । ଯେଉଁମାନେ ଅଗ୍ରସର ହେବେ, ସତ୍ୟବାଦୀର
ଜାତୀୟ ବିଦ୍ୟାଳୟ ଯେ ସେମାନଙ୍କ
ନିମନ୍ତେ ଉପଯୁକ୍ତ କ୍ଷେତ୍ର ହେବ, ଏଥିରେ ସନ୍ଦେହ ନାହିଁ ।
(ସମାଜ,
ତା
୨୯-୧-୧୯୨୭)
No comments:
Post a Comment