ପିଲାଙ୍କ ପାଇଁ କବିତା - 'ବୋଲକରା'

କବି - ଜଗନ୍ନାଥ ପ୍ରସାଦ ଦାସ

ଜିନରାଜ ଅଲ୍-ମଲିକ୍ ଅଲ୍-ଅସ୍ୱାଦ୍‌ଙ୍କ ଚିତ୍ର (୧୪ଶହ ଶତାବ୍ଦୀ)
'କିତାବ୍ ଅଲ୍ ବୁଲ୍‌ହାନ୍'ରୁ ଆନୀତ

ପୁରୁଣା ଦୀପକୁ ଘଷି କହିଲି ମୁଁ

ଏକ ଦୁଇ ତିନି

ହଠାତ ଆଗରେ ଆସି ଠିଆ ହେଲା

ବୋଲକରା ଜିନ ।

ସେଇ ଦିନୁ ରହିଛି ସେ ପାଖେ ପାଖେ

ଛାଇ ପରି ମୋର

ସବୁ କାମ କରି ଦିଏ କଥା ହେଲେ

ପାଟିରୁ ବାହର ।

ନିଦରୁ ଉଠାଇ ଦିଏ, ଚା' ଦିଏ

ଝାଡ଼ୁ ମାରେ ଘରେ

ରାନ୍ଧେ ଓ ପରଶିଦିଏ, ରାତିରେ ସେ

ଶୁଆଏ ନିଦରେ ।

ଆରାମରେ ଅଛି ମତେ ପଡ଼େ ନାହିଁ

କରିବାକୁ କିଛି

ମତେ କିନ୍ତୁ ପଚାରନି ଏ ଗୀତଟି

କିଏ ସେ ଲେଖିଛି ।

ବି.ଦ୍ର. - ଏହି କବିତାଟି ଜଗନ୍ନାଥ ପ୍ରସାଦ ଦାସ ଲିଖିତ ବହି 'ଆନମାନ'ରୁ ନିଆଯାଇଅଛି । ବହିଟି ଭୁବନେଶ୍ୱରସ୍ଥ ପ୍ରକାଶନ ସଂସ୍ଥା ଟାଇମପାସ ୨୦୧୬ ମସିହାର ମାର୍ଚ୍ଚ ମାସରେ ଛପାଇଥିଲେ ।