ଜାତୀୟ ଶିକ୍ଷା
ଗୋପବନ୍ଧୁ ଦାଶ
ଅରୁଣାଚଳ ପ୍ରଦେଶର ଶିଡ଼ିଠାରେ ଅବସ୍ଥିତ ଗାନ୍ଧୀଗ୍ରାମ |
ଅନେକେ କହନ୍ତି
ଜାତୀୟ ଶିକ୍ଷାର ବ୍ୟବସ୍ଥା ହୋଇ
ନ ଥିବା ସ୍ଥଳେ, ଉପସ୍ଥିତ
ଶିକ୍ଷା ସହସ୍ର ଦୋଷଯୁକ୍ତ ହେଲେ
ହିଁ ପରିହାର୍ଯ୍ୟ ନୁହେଁ । ମାତ୍ର
ଏମାନେ କେବଳ ଏତିକି କହି ନିଶ୍ଚିତ,
ଯେପରିକି ଜାତୀୟ
ଶିକ୍ଷାର ବ୍ୟବସ୍ଥା କରିବା
ସେମାନଙ୍କର କର୍ତ୍ତବ୍ୟ ନୁହେଁ
। ଆମ୍ଭେମାନେ କହୁଁ, ଯାହା
ଦୋଷାଦହ ବୋଲି ଜାଣିଲ,
ଯାହା ଆମ୍ଭମାନଙ୍କ
ଜାତୀୟ ଜୀବନ ବିକାଶରେ ଅନ୍ତରାୟ,
ତାହା ଆଗେ ତ୍ୟାଗ
କର । ଅଭାବ ହେଲେ ତାହାର ପୂରଣ
ଲାଗି ସ୍ୱତଃ ଚେଷ୍ଟା ହେବ । ଅସହଯୋଗ
ଅନୁସରଣ କରି କେତେକ ନିଷ୍ଠାପର
ଛାତ୍ର ସ୍କୁଲ, କଲେଜ
ଛାଡ଼ିଛନ୍ତି । ଅସହଯୋଗ ବାହାନାରେ
ଅନେକ ଅକର୍ମଣ୍ୟ ଛାତ୍ର ମଧ୍ୟ
ଶିକ୍ଷାରେ ଜଳାଞ୍ଜଳି ଦେଇଛନ୍ତି
। ଏହି ଉଭୟ ଶ୍ରେଣୀର ଛାତ୍ରଙ୍କ
ମଧ୍ୟରୁ କେତେକ ଏବଂ ସେମାନଙ୍କ
ମୁରବିମାନେ ଜାତୀୟ ବିଦ୍ୟାଳୟ
ଲାଗି ଉଦ୍ବ୍ୟସ୍ତ ଥିବାର ଦେଖାଯାଏ
।
ଅବଶ୍ୟ ଦେଶର
ନାନା ସ୍ଥାନରେ ଜାତୀୟ ବିଦ୍ୟାଳୟ
ବସୁଅଛି ଏବଂ ଶୀଘ୍ର ଆହୁରି ଅଧିକ
ବସିବା ଉଚିତ । ମାତ୍ର ଆମ୍ଭେମାନେ
କହୁ, ବର୍ତ୍ତମାନ
ଅବସ୍ଥାରେ ଯେଉଁମାନେ ଅସହଯୋଗ
ଅନୁସରଣ କରି ଛାଡ଼ିଛନ୍ତି,
ସେମାନଙ୍କର
ଜାତୀୟ ବିଦ୍ୟାଳୟ ଲାଗି ଏଡ଼େ
ଚଞ୍ଚଳ ହେବା ଆବଶ୍ୟକ କଅଣ ? ଯଥାର୍ଥରେ
ଅନେକ ଛାତ୍ର ଏବଂ ସେମାନଙ୍କ
ମୁରବିମାନେ ଜାତୀୟ ଶିକ୍ଷାର
ଅର୍ଥ ଓ ଉଦ୍ଦେଶ୍ୟ ବୁଝି
ନାହାନ୍ତି ।ସେମାନେ ଆପାଣର
ପୂର୍ବ ସଂସ୍କାର ଛାଡ଼ିପାରୁ
ନାହାନ୍ତି । ସରକାର ସମ୍ପର୍କୀୟ
ଯେଉଁ ବିଦ୍ୟାଳୟମାନେ ସେମାନେ
ଛାଡ଼ିଛନ୍ତି, ଜାତୀୟ
ତତ୍ତ୍ୱାବଧାନରେ ପରିଚାଳିତ
ଅଳ୍ପାଧିକ ପରିମାଣରେ ଠିକ୍
ସେହିପରି ବିଦ୍ୟାଳୟମାନ ସେମାନେ
ଲୋଡ଼ୁଛନ୍ତି ।
ଆମ୍ଭମାନଙ୍କର
ପରାମର୍ଶ ଏହି ଯେ, ମାନସିକ
ଦାସ୍ୟ ଭାବ ଦୂର କରିବା ଲାଗି
ପୁସ୍ତକଗତ ଶିକ୍ଷା ଏବେ କେତେ
ଦିନ ଏକାବେଳକେ ବନ୍ଦ ହେବା ପ୍ରୟୋଜନ
। ଦେଶର ଯୁବକମାନେ ପ୍ରଥମେ ମାନସିକ
ନିରହାର ପାଳନ କରନ୍ତି । ପୁସ୍ତକପାଠ
ଦ୍ୱାରା ମସ୍ତିଷ୍କକୁ ଅତିରିକ୍ତ
ଭାରାକ୍ରାନ୍ତ ନ କରି ବିଶ୍ରାମ
ଦିଅନ୍ତି, ହସ୍ତ, ପଦ, ଚକ୍ଷୁ, କର୍ଣ୍ଣ
ପ୍ରଭୃତି ଅନ୍ୟାନ୍ୟ କର୍ମେନ୍ଦ୍ରିୟର
ଉପଯୁକ୍ତ ଚାଳନା କରନ୍ତି । ଉପସ୍ଥିତ
ଜାତୀୟ କାର୍ଯ୍ୟରେ ଏହି ଇନ୍ଦ୍ରିୟମାନଙ୍କର
ବିହିତ ଏବଂ ନିୟତ ଚାଳନା ହେବାର
ଯଥେଷ୍ଟ ସୁବିଧା ଅଛି । ଅରଟରେ
ସୂତା କାଟିବା ଏବଂ ସେ ସୂତାରେ
ଲୁଗା ବୁଣିବାରେ ଏହି ସବୁ
ଅଙ୍ଗପ୍ରତ୍ୟଙ୍ଗ ସୁନ୍ଦର ଚାଳିତ
ହେବ । ଏଥିରେ ମନ ସ୍ଥିର ହେବ ।
ଏବଂ ଚିତ୍ତର ଏକାଗ୍ରତା ଆସିବ ।
ଦେଶର ପଲ୍ଲୀଗ୍ରାମରେ
ଲୋକ ସାଧାରଣଙ୍କ ମଧ୍ୟରେ ନୂତନ
ଆନ୍ଦୋଳନର ମର୍ମ ଓ ଉଦ୍ଦେଶ୍ୟ
ପ୍ରଚାର କରିବା ଅନ୍ୟ ଏକ କାର୍ଯ୍ୟ
। ଜାତୀୟ ସଙ୍ଗୀତ ବୋଲି ପଲ୍ଲିବାସୀ
ପ୍ରାଣରେ ନବ ଭାବ ଜନ୍ମାଇବାକୁ
ହେବ । ଗ୍ରାମେ କାଦୁଅ ପଙ୍କରେ
ବିଲ ଖାଲରେ ବୁଲି ଦେଶ ସଙ୍ଗେ
ଚାକ୍ଷୁଷ ପରିଚୟ ସ୍ଥାପନ କରିବାକୁ
ହେବ । ଦେଶର ଭାଷା ଶିଖି ଦେଶବାସୀର
ସ୍ୱରରେ ନିଜ ସ୍ୱର ମିଶାଇବାକୁ
ହେବ । ଦେଶର ପ୍ରକୃତ ଅଭାବ ହୃଦୟଙ୍ଗମ
କରିବାକୁ ହେବ । ସ୍ଥୁଳରେ ଦେଶର
ଆତ୍ମା ସଙ୍ଗେ ନିଜ ଆତ୍ମାକୁ
ଏକୀଭୂତ କରିବାକୁ ହେବ ।
ଅଥଚ ପୁସ୍ତକପାଠ
ବିନା ମାନସିକ ନିରାହାରେ ଏହା
ସବୁ କରିବାକୁ ହେବ । ଜାତୀୟ ବିଦ୍ୟା
ଅନୁଷ୍ଠାନର ଏହା ଅଧିବାସୀ କ୍ରିୟା
। ଜାତୀୟ ବିଦ୍ୟାଳୟରେ ପୁସ୍ତକ
ଧରି ଗଣିତ, ଭୂଗୋଳ, ଇତିହାସ
ଆଦି ବିଦ୍ୟାରମ୍ଭ କରିବା ପୂର୍ବରୁ,
ଦେଶର ଜନସାଧାରଣଙ୍କ
ସଙ୍ଗେ ମିଳନ ଏବଂ ଜାତୀୟ ଯନ୍ତ୍ର
ପରିଚାଳନା କରି ପୂର୍ବର ସଂସ୍କାର
କଳ୍ମଷ ଘୁଞ୍ଚାଇବା ଆବଶ୍ୟକ ।
ଏହି ପ୍ରକାର ବର୍ଜନ ଏବଂ ସାଧନ
ଜାତୀୟ ଶିକ୍ଷା ପ୍ରଣାଳୀରେ ପ୍ରଥମ
ସୋପାନ ।
No comments:
Post a Comment