ଜାତୀୟ ଶିକ୍ଷା ଓ ସାର୍ ଜନ୍ ଉଡ଼୍ରଫ୍
ଗୋପବନ୍ଧୁ ଦାଶ
ଭାରତରେ ପ୍ରାକ୍-ବ୍ରିଟିଶ ଶିକ୍ଷାନୁଷ୍ଠାନ ବିଦାର ମଦର୍ସା (ୱିକିମିଡିଆ କମନ୍ସ୍) |
ଆଜିକାଲି
ଦେଶରେ ସର୍ବତ୍ର ଜାତୀୟ ଶିକ୍ଷାର
ଆନ୍ଦୋଳନ ଚାଲିଛି; ଆଧୁନିକ
ଶିକ୍ଷାପଦ୍ଧତି ନାନା ଦୋଷରେ
ଦୂଷିତ । ଏହା ଚିନ୍ତାଶୀଳ ବ୍ୟକ୍ତିମାତ୍ର
ବୁଝି ଅଛନ୍ତି । ଜାତୀୟ ଅଭାବ ବା
ଆକାଂକ୍ଷା ପୂରଣ କରିବା ଜାତୀୟ
ଶିକ୍ଷାର ମୁଖ୍ୟ ଉଦ୍ଦେଶ୍ୟ ।
ଜାତୀୟ ଇତିହାସ ଉପରେ ପୁଣି ତାହା
ପ୍ରତିଷ୍ଠିତ ହେବା ଉଚିତ । ମାତ୍ର
ବର୍ତ୍ତମାନ ଯେଉଁ ଶିକ୍ଷା ଚାଲିଛି, ତା'ର ପ୍ରକୃତି ଭିନ୍ନ ପ୍ରକାର ।
ଭାରତର ଜାତୀୟତା ସହିତ ଏହାର କୌଣସି
ସମ୍ପର୍କ ନାହିଁ, ଭାରତ
ଇତିହାସରୁ ଏହା ଏକ ସ୍ୱତନ୍ତ୍ର
ବସ୍ତୁ । ପ୍ରତ୍ୟେକ ଜାତିର ଗାଟିଏ
ଗୋଟିଏ ସ୍ୱାତନ୍ତ୍ର୍ୟ ଅଛି ।
ସେହି ସ୍ୱାତନ୍ତ୍ର୍ୟ ସେ ଜାତିର
ଇତିହାସ । ଯେତେ ଦିନ ସେହି ସ୍ୱାତନ୍ତ୍ର୍ୟ
ସୁରକ୍ଷିତ ଥାଏ, ଜାତି
ସେତେ ଦିନ ଜୀବିତ ଥିବାର କୁହାଯାଏ ।
ଶିକ୍ଷା ଏହି ସ୍ୱାତନ୍ତ୍ର୍ୟ
ରକ୍ଷା କରିବାର ସର୍ବପ୍ରଧାନ
ଉପାୟ । ସୁତରାଂ ପ୍ରତ୍ୟେକ ଜାତି
ନିମନ୍ତେ ଶିକ୍ଷା ସ୍ୱତନ୍ତ୍ର ।
ଏକ ଜାତିର ଶିକ୍ଷା, ଅନ୍ୟ
ଜାତି ଉପରେ ପକାଇଲେ ସେ ଜାତିର
ମୃତ୍ୟୁ ଅବଶ୍ୟମ୍ଭାବୀ ।
ଭାରତୀୟ
ଶିକ୍ଷା ଭାରତର ଜାତୀୟ ପରମ୍ପରା
ଅନୁସାରେ ପରିଚାଳିତ ହେବା ଉଚିତ ।
ମାତ୍ର ବର୍ତ୍ତମାନ ଶିକ୍ଷା ଭାରତର
ନୁହେଁ; ଏହା ଇଂଲଣ୍ଡର ଶିକ୍ଷା
ଭାରତୀୟ ବିଶ୍ୱବିଦ୍ୟାଳୟମାନ
କେମ୍ୱ୍ରିଜ, ଅକ୍ସ୍ଫୋର୍ଡ଼ ବିଦ୍ୟାଳୟମାନଙ୍କ ଛାଞ୍ଚରେ
ଗଢ଼ା । ସେହିମାନଙ୍କ ଆଦର୍ଶରେ
ଏବଂ ସେମାନଙ୍କ ପ୍ରଦର୍ଶିତ
ପନ୍ଥାରେ ଏ ଦେଶରେ ବିଶ୍ୱବିଦ୍ୟାଳୟ
ମାନ ଚାଲୁଅଛି । ମୋଟରେ, ବିଜେତା,
ବିଜିତ
ଜାତିକୁ ତାହାର ଜାତୀୟତାରୁ ବଞ୍ଚିତ
କରାଇ ନିଜର ଭକ୍ତ କରାଇବା ନିମନ୍ତେ
ଯେପରି ଶିକ୍ଷା ଦୀକ୍ଷା ଦିଏ, ଆଧୁନିକ ଶିକ୍ଷା କେବଳ ସେହି ଧରଣର ।
ଅଢ଼େଇ ହଜାର ବର୍ଷ ପୂର୍ବେ ମାନବ
ସଭ୍ୟତାର ପ୍ରାୟ ଆଦିମ ଅବସ୍ଥାରେ
ଆଲେକଜାଣ୍ଡାର ବିଜିତ ଦେଶମାନଙ୍କରେ
ଯେ ପ୍ରକାର ଶିକ୍ଷାର ପ୍ରଚାର
କରୁଥିଲେ, ଭାରତରେ ଆଜି ସେହି ରୂପ
ଶିକ୍ଷାର ବ୍ୟବସ୍ଥା ହୋଇଅଛି ।
ଭାରତବାସୀ ଆପଣାର ସନାତନ ଧର୍ମ
ଓ ସଭ୍ୟତାରୁ ବଞ୍ଚିତ ହୋଇ, ଏକ
ବୈଦେଶିକ ଆଦର୍ଶରେ ଗଢ଼ା ହେଉଛନ୍ତି ।
ଫଳରେ ସେହି ଆଦର୍ଶର ଅଜ୍ଞାନ
ଦାସତ୍ୱରେ ଭାରତବାସୀ ମୁଗ୍ଧ ।
ସୁଖର
କଥା ଏତେ କାଳ ଦାସତ୍ୱ ପରେ ଭାରତର
ଚେତନା ଆସି ଅଛି ଏବଂ ସେ ଅଜ୍ଞାନତାରୁ
ମୁକ୍ତି ପାଇବାର ପ୍ରୟାସ କରୁଛି ।
କେବଳ ଭାରତବାସୀ ଯେ ଏହା ବୁଝିଛନ୍ତି
ତାହା ନୁହେଁ, ଅନ୍ୟାନ୍ୟ ଇଂରେଜମାନଙ୍କ
ମଧ୍ୟରେ କଲିକତା ହାଇକୋର୍ଟର
ବିଚାରପତି ଉଦାର ସାର ଜନ୍ ଉଡ଼୍ରଫ
ବହୁ କାଳରୁ ଭାରତର ବର୍ତ୍ତମାନ
ଶିକ୍ଷାର କୁଫଳ ଆଶଙ୍କା କରି
ଅଛନ୍ତି । କଲିକତା ବିଶ୍ୱବିଦ୍ୟାଳୟ
କମିଶନଙ୍କ ସମକ୍ଷରେ ସେ ଏହା
ନିର୍ଭୀକ ଚିତ୍ତରେ ପ୍ରକାଶ
କରିଥିଲେ । ଦୁଇ ବର୍ଷ ପୂର୍ବେ
ଗୋଟିଏ ପୁରସ୍କାର ବିତରଣ ସଭାରେ
ଏହି ମର୍ମରେ ସେ କହିଥିଲେ ।
ଇଂରେଜ
ଧରଣରେ ଏ ଦେଶରେ ଯେ ଶିକ୍ଷା
ଦିଆ ଯାଇ ଅଛି, ତାହା କଦାପି ବାଞ୍ଚ୍ଥନୀୟ
ନୁହେଁ । କେବଳ ପରୀକ୍ଷାରେ
କୃତକାର୍ଯ୍ୟ ହେବା ପାଇଁ ପ୍ରସ୍ତୁତ
ହେବା ଶିକ୍ଷା ନୁହେଁ । ଭାରତକୁ
ଭାରତୀୟ ଭାବରେ ଉନ୍ନତ କରାଇବା
ନିମନ୍ତେ ଯେଉଁମାନଙ୍କର ହୃଦୟର
ଆକାଂକ୍ଷା, ସେହିମାନେ ହିଁ ପ୍ରକୃତରେ
ଭାରତବର୍ଷରେ ଶିକ୍ଷାଦାନ କରିବାର
ଉପଯୁକ୍ତ । ବାହ୍ୟିକ
କର୍ତ୍ତ୍ୱତ୍ୱ ଜୀବନ ବିକାଶର
ପ୍ରଧାନ ଅନ୍ତରାୟ । ପୁଣି ଯେଉଁମାନଙ୍କ
ହାତରେ ସେ କର୍ତ୍ତୃତ୍ୱ ଅଛି,
ସେମାନେ
ବୈଦେଶିକ ଏବଂ ଭାରତର ଅଭାବ ଓ
ଆକାଂକ୍ଷା ବୁଝିବା ସେମାନଙ୍କ
ପକ୍ଷରେ କଠିନ । ସୁତରାଂ
ଏ ଦେଶର ଶିକ୍ଷା ପ୍ରକୃତ ପନ୍ଥା
ଛାଡ଼ି ଅସ୍ୱାଭାବିକ ହେବା ବିଚିତ୍ର
କ'ଣ ।
ଦୁଃଖର କଥା ଭାରତୀୟମାନଙ୍କୁ
ଶିକ୍ଷାର ଏହି କୁଫଳ ଦେଖା ଯାଉ ନାହିଁ ।
ଶିକ୍ଷାର ଏହି ଅସ୍ୱାଭବିକତା
ସେମାନଙ୍କୁ ଦେଖା ଯାଉ ନାହିଁ, କାରଣ
ସେମାନେ ନିଜେ ଏହି ଅସ୍ୱାଭାବିକତା
ଶିକ୍ଷାରେ ମୁଗ୍ଧ ହୋଇ ଆପାଣର
ଜୀବନ ଓ ଜାତୀୟତା ନଷ୍ଟ କରି ଅଛନ୍ତି ।
ଆପାଣର ପ୍ରାଚୀନ ଇତିହାସ ବା
ଜାତୀୟତା ସମ୍ୱନ୍ଧରେ କିଛି ନ
ଜାଣି ସେମାନେ ବର୍ତ୍ତମାନ ଶିକ୍ଷା
ଶେଷ କରୁ ଅଛନ୍ତି । ଭାରତ ଇତିହାସ
ଯେପରିକି ମୁସଲମାନମାନଙ୍କ
ଆକ୍ରମଣଠାରୁ ଆରମ୍ଭ । ମୁସଲମାନ ରାଜତ୍ୱ
ଓ ଇଂରେଜ ଆଧିପତ୍ୟ ବିସ୍ତାର ଛଡ଼ା
ଛାତ୍ରମାନେ ବର୍ତ୍ତମାନ ଭାରତର
ପ୍ରାଚୀନ ଇତିହାସ ସମ୍ୱନ୍ଧରେ
ସେମାନେ ଏକା ବେଳକେ ଅନଭିଜ୍ଞ ।
ନିଜ ଭାଷାରେ ବିଶ୍ୱବିଦ୍ୟାଳୟ
ଉପାଧି ପାଇବାରେ ସେମାନଙ୍କର
ଅଧିକାର ନାହିଁ । ଅବଶ୍ୟ ଇଂରେଜ
ଭାଷା ଏବଂ ଆବଶ୍ୟକୀୟ ପାଶ୍ଚାତ୍ୟ
ସାହିତ୍ୟ ଓ ବିଜ୍ଞାନ ଯେ ଏ ଦେଶର
ଶିକ୍ଷାରୁ ଉଠାଇ ଦେବା ଉଚିତ,
ତାହା
ନୁହେଁ । ମାତ୍ର ମୁଁ କହିବାର କଥା, ଏ ଦେଶର ଶିକ୍ଷା ପଦ୍ଧତିରେ ଭାରତୀୟ
ଧର୍ମ ସାହିତ୍ୟ ଓ ସଭ୍ୟତାର ଉପଯୁକ୍ତ ସ୍ଥାନ ରହୁ । ଶିକ୍ଷାରୁ ବର୍ତ୍ତମାନ
ସରକାରଙ୍କର କର୍ତ୍ତୃତ୍ୱ ଯେତେ
ଉଠିଯାଏ ସେତେ ଭଲ । ସୁଖର କଥା
ଉଦାରଚେତା ସରକାରଙ୍କଠାରୁ ସାହାଯ୍ୟ
ଭିକ୍ଷା ନ କରି ସ୍ଥାନେ ସ୍ଥାନେ
ସ୍କୁଲ ପ୍ରତିଷ୍ଟିତ ହେଉଅଛି ।
ସରକାର ଅବଶ୍ୟ ଶିକ୍ଷା ପାଇଁ
ସାହାଯ୍ୟ ଦେବେ । କିନ୍ତୁ ସରକାର
ସାହାଯ୍ୟ ଦ୍ୱାରା ଶିକ୍ଷା ବିଷୟରେ
ସରକାରଙ୍କର ସାହାଯ୍ୟ ଅପେକ୍ଷା
ନକରି ସ୍ୱାଧୀନ ଭାବରେ ନିଜ ବ୍ୟୟରେ
ବିଦ୍ୟାଳୟମାନ ବସାଇ ଚଳାଇବା
ଏକାନ୍ତ ପ୍ରୟୋଜନ ।
ଜାତୀୟ ଶିକ୍ଷା
ବିଷୟରେ ସରକାରଙ୍କର ସାହାଯ୍ୟ
ଅପେକ୍ଷା କରିବା ଦ୍ୱାରା ଶିକ୍ଷାର
ପ୍ରକୃତି ଓ ସ୍ୱାତନ୍ତ୍ର୍ୟ ନଷ୍ଟ
ହେଉ ଅଛି; ସର୍ବଦା ଶିକ୍ଷା ଦିଆ ଯାଉ
ଅଛି, ସେମାନଙ୍କର ପ୍ରାଚୀନ ଜାତୀୟ
ସଭ୍ୟତା ନୀରସ ନିକୃଷ୍ଟ ଓ ନିର୍ଜୀବ ।
ସେମାନଙ୍କର ପୂର୍ବ ପୁରୁଷମାନେ
କୌଣସି ଉନ୍ନତି କରି ନ ଥିଲେ, ଯାହା
ବା କରିଥିଲେ ତାହା ପାଶ୍ଚାତ୍ୟ
ଜାତିମାନଙ୍କ ଗୌରବମୟ ସାଧନା
ନିକଟରେ ଅକିଞ୍ଚିତ୍କର ମାତ୍ର ।
ଏହି କଥା ବାରମ୍ୱାର ସେମାନଙ୍କୁ
କୁହା ଯିବାରେ, କ୍ରମେ ସେମାନଙ୍କର
ମଧ୍ୟ ଆତ୍ମପ୍ରତ୍ୟୟ ଯାଇ ନିଜ ନିଜ
ସଭ୍ୟତାରେ ସନ୍ଦେହ ହେଲାଣି, ଏବଂ
ପାଶ୍ଚାତ୍ୟ ଶିକ୍ଷା ଓ ସଭ୍ୟତାର
ମହତ୍ତ୍ୱରେ ବିଶ୍ୱାସ ଜନ୍ମି ଗଲାଣି ।
ବର୍ତ୍ତମାନ ପ୍ରକୃତ ଭାରତୀୟ
ଶିକ୍ଷା ଦ୍ୱାରା ପ୍ରାଚୀନ ଭାରତର
ଗୌରବ ପୂର୍ଣ୍ଣ ମାତ୍ରାରେ
ଯୁବକମାନଙ୍କୁ ଦେଖାଇବା ପ୍ରୟୋଜନ ।
ତାହା ହେଲେ ପାଶ୍ଚାତ୍ୟ ସଭ୍ୟତାର
ବ୍ୟାମୋହରୁ ସେମାନେ କ୍ରମେ
ମୁକ୍ତ ହେବେ ଏବଂ ଆପାଣର ଜାତୀୟତା
ଓ ପ୍ରାଚୀନ ଗୌରବ ଉପରେ ସେମାନଙ୍କର
ବିଶ୍ୱାସ ଜନ୍ମିବ।
(ସତ୍ୟବାଦୀ
୬ଷ୍ଠ ଖଣ୍ଡ ୧୩୨୮ ସାଲ)
No comments:
Post a Comment