ପିଲାଙ୍କ ଇତିହାସ ପାଠ - 'ଗୌତମ ବୁଦ୍ଧ'
କେଦାରନାଥ ମହାପାତ୍ର
ବମ୍ବେ ଉପକଣ୍ଠସ୍ଥ କହ୍ନେରି ଗୁମ୍ଫା ନଂ ୩୪ରେ ଅଙ୍କିତ ବୁଦ୍ଧଙ୍କର କାନ୍ଥଚିତ୍ର ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍ |
ପ୍ରାଚୀନ
କାଳରେ ହିମାଳୟର ପାଦଦେଶରେ
କପିଳବାସ୍ତୁ ନାମକ ଗୋଟିଏ ନଗରୀ
ଥିଲା । ସେଠାରେ ଶାକ୍ୟବଂଶ ରାଜତ୍ୱ
କରୁଥିଲେ । ଗୌତମ ବା ସିଦ୍ଧାର୍ଥ
ସେହି ଶାକ୍ୟବଂଶୀୟ ରାଜା ଶୁଦ୍ଧୋଦନଙ୍କର
ପୁତ୍ର ଥିଲେ । ବାଲ୍ୟକାଳରେ ତାଙ୍କ
ପିତା ତାଙ୍କୁ ସକଳ ପ୍ରକାର ଶିକ୍ଷା
ଦେଇଥିଲେ ଏବଂ ସୁଖ ଓ ବିଳାସରେ
ବଢାଇଥିଲେ, କିନ୍ତୁ
ପିଲାଦିନୁ ସେ ସଂସାର ବିଷୟରେ
ଚିନ୍ତା କରୁଥିଲେ । ତାଙ୍କର ପିତା
ତାଙ୍କୁ ଯଶୋଧାରା ନାମ୍ନୀ ସୁନ୍ଦରୀ
ରାଜକନ୍ୟା ସହିତ ବିବାହ କରାଇ
ଥିଲେ । ତାଙ୍କର ଗୋଟିଏ ପୁତ୍ର
ମଧ୍ୟ ହୋଇଥିଲା । ସଂସାରରେ ଲୋକେ
ଯାହାକୁ ସୁଖ ବୋଲି କହନ୍ତି ଗୌତମଙ୍କର
ସେ ସମସ୍ତ ଥିଲା । ଧନ,
ମାନ,
ଯୌବନ,
ରାଜ୍ୟ,
ସ୍ତ୍ରୀ,
ପୁତ୍ର,
ବନ୍ଧୁ
ପ୍ରଭୃତି ତାଙ୍କର ସକଳ ଥିଲା ।
ତଥାପି ସେ ସଂସାର ସୁଖରେ ଭୁଲି
ଯାଇ ନ ଥିଲେ । ସଂସାରର ଦୁଃଖ,
ଶୋକ,
ରୋଗ,
ମୃତ୍ୟୁ
ପ୍ରଭୃତି ଦେଖି ତାଙ୍କର ହୃଦୟ
କାନ୍ଦିଲା । ଲୋକମାନଙ୍କର ଦୁଃଖ
ଦୂର କରିବା ପାଇଁ ତାଙ୍କର ପ୍ରାଣ
ଆକୁଳ ହେଲା । ତେଣୁ ସେ ସଂସାରର
ସମସ୍ତ ସୁଖରେ ଜଳାଞ୍ଜଳି ଦେଇ
ଅନ୍ଧାର ରାତ୍ରିରେ ଘରୁ ପଳାଇଗଲେ । ଗୃହସଂସାର ଛାଡି ସେ ପ୍ରଥମେ
ବୈଶାଳୀରେ ଥିବା ଜଣେ ବ୍ରାହ୍ମଣ
ପଣ୍ଡିତଙ୍କର ଶିଷ୍ୟ ହେଲେ ଓ ପରେ
ରାଜଗୃହରେ ଅନ୍ୟ ଜଣେ ବ୍ରାହ୍ମଣ
ପଣ୍ଡିତଙ୍କଠାରୁ ଶିକ୍ଷାଲାଭ
କରିଥିଲେ । ସେମାନଙ୍କର ଶିକ୍ଷାରେ
ସନ୍ତୋଷ ଲାଭ ନ କରିବାରୁ ସେ
ଉରୁବିଲ୍ୱ ନାମକ ସ୍ଥାନରେ ଛଅ ବର୍ଷ
କାଳ କଠୋର ତପସ୍ୟା କଲେ । ତପସ୍ୟା
କରି ତାଙ୍କର ଦେହ ଏକାବେଳକେ କ୍ଷୀଣ
ହୋଇଗଲା । ତହୁଁ ସେ ସଂସାର ବିଷୟରେ
ଗଭୀର ଚିନ୍ତା କରି ଦିବ୍ୟ ଜ୍ଞାନ
ଲାଭ କରିଥିଲେ ଓ ବୁଦ୍ଧ ନାମରେ
ଅଭିହିତ ହେଲେ । ତାଙ୍କ ଦ୍ୱାରା
ପ୍ରଚାରିତ ଧର୍ମର ନାମ ବୌଦ୍ଧ ଧର୍ମ
।
ସେ
ପ୍ରଥମେ ବାରାଣସୀ ବା କାଶୀରେ
ବୌଦ୍ଧ ଧର୍ମ ପ୍ରଚାର କଲେ । ଚାହୁଁ
ଚାହୁଁ ତାଙ୍କର ଯଶ ଚାରିଆଡ଼େ ବ୍ୟାପିଗଲା ଓ ଶତ ଶତ ଲୋକ ତାଙ୍କ
ଧର୍ମ ଗ୍ରହଣ କଲେ । ମଗଧ ସମ୍ରାଟ
ବିମ୍ୱିସାର ତାଙ୍କ ସଙ୍ଗେ ବହୁ
ଆଲୋଚନା କରି ତାଙ୍କ ଧର୍ମ ଗ୍ରହଣ
କଲେ । ବିମ୍ୱିସାରଙ୍କ ପୁତ୍ର
ଅଜାତଶତୃ ମଧ୍ୟ ତାଙ୍କର ଶିଷ୍ୟ
ହେଲେ । ଶାକ୍ୟବଂଶର ଅଧିକାଂଶ
ଲୋକ ମଧ୍ୟ ତାଙ୍କର ଧର୍ମ ଗ୍ରହଣ
କଲେ । କାଶୀ, ବୈଶାଳୀ,
ରାଜଗୃହ,
ଗୟା,
ଶ୍ରାବସ୍ତି
ପ୍ରଭୃତି ବୌଦ୍ଧ ଧର୍ମ ପ୍ରଚାରର
କେନ୍ଦ୍ର ହେଲା । ଏହି ପରି ବହୁ କାଳ
ଧର୍ମ ପ୍ରଚାର କରି, ସେ ୮୦ ବର୍ଷ
ବୟସରେ କୁଶୀ ନଗରରେ ପ୍ରାଣତ୍ୟାଗ
କଲେ । ପୃଥିବୀରେ ମହାପୁରୁଷମାନଙ୍କ
ମଧ୍ୟରେ ବୁଦ୍ଧ ସର୍ବଶ୍ରେଷ୍ଠ
। ସେ ମରି ଯାଇ ଅଛନ୍ତି ସତ୍ୟ,
କିନ୍ତୁ
ଆଜି ସୁଦ୍ଧା ପୃଥିବୀର ୫୦ କୋଟି
ଲୋକ ତାଙ୍କର ଧର୍ମମତ ଅନୁସରଣ
କରନ୍ତି ।
ବି.ଦ୍ର. - ଏହି ଲେଖାଟି 'ଅଭିନବ ଭାରତ ଇତିହାସ' ବହିରୁ ନିଆଯାଇଛି । ପୁସ୍ତକଟି କେଦାରନାଥ ମହାପାତ୍ରଙ୍କ ଦ୍ୱାରା ୬ଷ୍ଠ ଓ ୭ମ ଶ୍ରେଣୀ ନିମନ୍ତେ ପାଠ୍ୟପୁସ୍ତକ ଭାବରେ ଲିଖିତ ଓ ଷ୍ଟ୍ୟୁଡ଼େଣ୍ଟ୍ସ୍ ଷ୍ଟୋର୍ଙ୍କ ଦ୍ୱାରା ୧୯୩୮ ମସିହାରେ ପ୍ରକାଶିତ । ସୃଜନିକ ସଂସ୍ଥାଙ୍କ ସୂତ୍ରରୁ ବହିଟି ମିଳିଥିବାରୁ ଆମେ ତାଙ୍କ ପାଖରେ କୃତଜ୍ଞ ।
No comments:
Post a Comment